凡事都有兩面，睇清楚有咩利弊，細心思考之後再做決定先係精明打工仔！上一篇講咗轉工Jumpy有咩好，呢一篇講下有咩唔好，或者叫potential risk（潛在危機）。

伸延閱讀：【搵工跳槽】Jumpy對於打工仔嚟講，係好定唔好？（上）

1. 搵工難啲

喺公司嘅立場，招聘人員會希望受聘者可以穩定喺公司工作，原因每次對外聘請一個人係需要好多成本（例如時間、落廣告、行政上嘅功夫）。如果HR喺收CV嘅時候已經見到你每份工都做唔長，就算你嘅經驗同技能幾適合，都可能會放埋一邊先，而傾向揀一啲相對每份工任職時間比較穩定嘅求職者去見。除非你喺業內係大名鼎鼎，個個都識你，否則小薯之間比較，就係你份CV入面嘅內容。

2. 經驗散啲

Jumpy另一個唔好嘅地方係，雖然你喺短時間入面做過好多唔同公司，職位有唔同嘅變化，技能同專業知識豐富咗，但未必清楚點樣喺職涯上有更好嘅成長（最後可能變咗Slasher）。如果你能夠喺一間公司入面長啲時間，你對公司嘅文化，晉升階梯，人才走向會更加熟悉，你嘅進步就唔單止喺知識上，可能係其他不同範疇，例如管理。

伸延閱讀：職涯新趨勢：多職人生

3. 對工作不滿啲

部份打工仔轉工係因為不滿工作內容，甚至係公司政策。但試諗下如果你每次遇到問題有不滿就轉工，你可能會學唔識點樣面對突如其來嘅壓力同挑戰，始終世界上係無完美嘅公司。有時打工仔會需要兩年甚至更長嘅時間先適應一個新嘅職位，學習喺挑戰同困難入面鍛鍊應對能力，耐性同情緒，都係令你喺職場上成熟嘅關鍵。

4. 福利少啲

喺香港，有啲公司竟然會話五天工作同銀行假講成係福利，真心無言，但呢啲係極端例子。某啲大公司嘅福利都係同喺公司入面嘅年期掛鉤，又或者定期發放，甚至有啲公司仲有類似公積金，超低息借貸供樓等等福利，呢啲都唔係Jumpy員工可以享有。

5. 壓力大啲

每一次轉工唔多唔少都會帶嚟心理負擔，又要見工，傾新offer，識新同事，重新習慣公司文化等等。甚至公司地點上嘅轉變，如果多咗舟車勞頓，更加會覺得「心很累」。喺轉工之前，不妨諗下轉工嘅成本有幾高，對你嘅健康、家庭、情緒有好定壞嘅影響。

無論你最後係轉工定係唔轉工，只要細心思考而唔係衝動做決定，你總會搵到適合自己嘅出路嘅！